做塘邊鶴從來都容易，美國大選，半個香港指指點點，網上討論熱血沸騰；香港出事喎朋友？「我唔識政治」、「唔好咩都政治化」、「都做唔到啲咩㗎啦」，「（沉默……）今晚食乜好？」
OKOK，明白晒。
明明自己係等死嘅豬，笑人做等死嘅豬。
咁啱近嚟美國真係有套叫《美豬出城》嘅紀錄片上映，講美國好豬，乜都差過人，所以導演Michael Moore要一人出征，侵略世界。
其實係向其他福利好、人民好、教育好嘅國家學習，希望美國豬豬們會覺悟。
好適合嗰啲日日大叫「美國都係咁啦」、「美國仲恐怖呀」嘅朋友睇。
（上映日期：11月17日）
美國影壇頭號憤青
網上有人形容導演Michael Moore係「美國影壇頭號憤青」，又講得幾好，因為佢嘅個人觀點好強，每套紀錄片都係搵緊point去支持自己觀點，中肯？絕對稱唔上，但如果你buy佢嗰套，一定會拍爛手掌。
身為左翼份子，佢成日拍埋啲夭心夭肺，笑美國笑自己友嘅紀錄片，總之個社會就好多問題乜都唔啱，佢應該傷害咗全美國3億人嘅感情。
例如2004年嘅《華氏911》（Fahrenheit 9/11），就由2000年美國傳統大選開始批評布殊，暗示佢故意令911事件發生，又指美國傳媒喺反恐戰上推波助瀾。《華氏911》當年贏咗康城金棕櫚獎，唔明點解無人DQ佢。
另外佢套《美國清一Sick檔案》（Sicko），指美國醫療保險不足，片中佢研究咗加拿大同法國嘅醫療制度，發現人哋政府好有保障，偏偏美國又真係發達國家中，唯一一個無公營醫療保險嘅國家，大家要買保險自保。
睇睇下，原來香港都拍得住美國，仲唔係超英趕美。
原來香港都幾似美國
嚟到《美豬出城》，Michael Moore點會放過美國？只會繼續大大力抽擊，今集個切入點係美國人交稅，原來差唔多6成都係用咗去俾美國出兵，但結果呢？自二次世界大戰之後，美國其實未算真正贏過一場仗。
然後佢覺得軍隊太廢，佢要一個人隻身進攻世界各國，其實套戲個英文名，就叫「Where to invade next」。首先去咗意大利，佢要去偷人哋嘅假期制度，原來意大利人一年差唔多有成個月有薪假，lunch仲可以返屋企煮飯食，老闆又完全唔介意員工過得舒服，「開心最緊要！」希望你老闆我老闆都學下啦。
之後Michael Moore大舉入侵歐洲，包括借精美法國小學餐，踩美國學校俾學生食垃圾；借德國教育納粹歷史，指美國隱瞞屠殺原居民；探訪挪威舒服到爆炸嘅監獄（殺人犯可以拎刀，痴線！但佢哋間房大過你香港啲百幾呎studio flat，仲痴線），對比美國以暴力懲治囚犯；芬蘭學生全球排名數一數二，但人哋唔使做功課，每星期只需要做個真正小朋友，玩！
仲有好多好多例子，事實歐洲真係咁天堂？絕對唔係，但對比美國又真係開心得多，再諗返香港，我哋同美國啲衰嘢差唔多，雖然畫面好好笑，但心裏面痛到喊。
下個目標：特朗普
另外想補充少少，Michael Moore近日有兩篇美國大選文瘋傳。第一篇係佢喺7月時預言特朗普一定會做總統（其實佢2015年已經講過特朗普會做到共和黨總統提名人），更喺自己網站寫咗5大原因。
例如佢認為特朗普根本唔蠢，好識得操控群眾、憤怒嘅白人會支持佢、希拉莉誠信問題、甚至認為美國人投佢只單純地係「just because they could」。
第二篇就係佢喺Facebook發表，叫做「Morning After To-Do List」嘅長文，又例出咗5樣當下美國人要做嘅嘢，包括人民要重奪民主黨、炒晒所有唔肯認清現實嘅時事分析員、大家停止講「好驚訝」，因為美國發展到今日有呢個投票結果，其實係日積月累嘅結果！佢仲喺紐約同民眾一齊上街遊行反特朗普。
其實Michael Moore最新作品就係叫《Michael Moore in TrumpLand》，10月18日喺美國上映，一直秘密拍攝，正正就係講特朗普點樣勝出呢場總統大選，香港片商即刻買嚟上，應該都會收得。
